बाबा साहेब तोर मानने वाला दुनिया म कमती नइये

बाबा साहेब तोर मानने वाला
दुनिया म कमती नइये .
अतके हवे पीरा, लाचार हवे हीरा
इहि कीता सुमति नइये.

कोटिन नर- नारी सब
तोरेच मनइय्या ये
जतकां हे गरीब जग म
जय भीम कहइय्या ये
भूख- दुःख सहिथे,
फेर बाबा साहेब कहिथे
भजे म गलती नइये

जतेक हे जवान
पढ़े- लिखे सब जानत हे
दुनिया- जहान आज
बाबा साहेब मानत हे
कतको झुकाथे तभू
घेंच ल उठाथे
जुलुम से नमती नइये

बाबा साहेब तोर नाम
दिनो- दिन बढ़े जात हे
धरे हे पुरान तिही
मन ह डरात हे
पांव ऊंकर थम गे हे
दांव ऊंकर थम गे हे
बाढ़ हमर थमती नइये
- के. आर. मार्कण्डेय