तैं पियाये बबा दुनिया ल अमरित घोर के

तैं पियाये बबा दुनिया ल अमरित घोर के
टूटे- टाटे मनखे ल जोर के
जाति के रूंधना , पोथी के बंधना
माटी म मिलाये , तैं टोर के

एक अमरित केहे , संत हमर अव
साहेब केहेव , पंथ हमर अव
मन के मंदिर ल अंजोर के

एक अमरित केहे , बैर झन करिहौ
कोनो महाराजा के , पैर झन परिहौ
दाई- ददा , गुरू जन छोड़ के

एक अमरित घोरे , सत्य वचन बर
सत के सहारा केहे , सत्य भजन कर
झूठ के भरम- भूत छोर के

एक अमरित केहे , जग हे अनोखा ग
दिही रे बइरी तुम्हला , पग- पग धोखा ग
राखे रहि तोला बिल्होर के

एक अमरित हवे , तोर कहानी ह
रसदा देखावत हवे , तोर निशानी ह
काड़ी- कचरा ल अल्होर के

एक अमरित तोर , ज्ञान के धारा हे
बिना ज्ञान गुरू कहाँ , मुक्ति हमारा हे
ज्ञान किवड़िया ल खोल के

एक अमरित दिये , खेति- किसानी ल
नागर- बख्खर , जग के सियानी ल
धुर्रा चंदन होगे खोर के

- सा. के. आर. मार्कण्डेय